Monday, February 24, 2014

Why should north listen to south?



Question :
Why should North Indians and media listen to Tamils?

Answer: 1) Long before the so called 1857 Sepoy Mutiny, the Polygars and Kings of Tamil land fought against the East India Company. Southerners, particularly Tamils initiated the freedom struggle then the rest of Indian sub continent followed it much later which lead to the notion of India.
2) When the Central Government of India tried to IMPOSE Hindi to all Indian citizens, it was the Tamils who raised their voice against the IMPOSITION. Once Tamils started as usual, rest of Indian Republic followed and the HINDIANS finally withdrew the idea and India's sovereignty was saved
3) Tamils voices are louder for Reservation Social justice. They demanded their rights then Indian citizens realised the importance of Social justice.  Country had V.P.Singh to implement Mandal recommendations , first people who supported it were Tamils. If at all Social justice prevails in India, it is solely because of the struggle initiated by Tamils even before the independence lead by Periyar.
4) When North India was burning in riots, Tamilnadu remained silent. Be it  Calcutta riots that happened before independence or be it partition riots, be it the Babri Masjid riot initiated by Hindu fanatics, there were NO notable incidents here in Tamilnadu. As far as religious harmony is concerned, Tamilnadu still remains a wonderful example to all of India. Tamils knew the secret of how to preserve 'Bhaiya-Bhaiya' relationship between various religions.
5)Indian Tamils constantly insisted the center to support Tamils in Srilankan civil war since its very beginning. But Rajeev did exactly the opposite and his decision on Srilanka was a complete fiasco. Adding to the failure of IPKF, now Srilanka is under china's occupancy, which is a REAL AND PRESENT DANGER to INDIA. If only India had ears for what Tamils had to say, Ealam, nation of Ealam Tamils would have been India's Loyal base against the Chinese forces in Srilanka.
Conclusion :- Thus rebellious voices from Tamils always have great benefits for the Indian Republic-----------

Friday, February 21, 2014

திமிறும் தமிழர்கள்! நேற்று இன்று நாளை- கிளிமூக்கு அரக்கன் கட்டுரை

திமிறும் சோற்றாலடித்தப் பிண்டங்கள் - கட்டுரை

இமயவரம்பன் என பதிற்றுப்பத்து பாடல்களை வாசிக்கும்பொழுதும் சரி, கலிங்கம் வென்றான் என கலிங்கத்துப்பரணியை பாடத்திற்காகப் படிக்கும் போதும் சரி, இவை எல்லாம் தமிழர்களின் அதீத கற்பனை என்றிருந்த எண்ணம் சுனாமிக்குப்பின்னர் சங்கப் பாடல்களில் மிகைபுனைவுகளுக்கு இணையாக வரலாறும் ஒளிந்து இருக்கலாம் என்ற கருதுகோளாக மாறியது. ஆழத்தோண்டாமல் அகலத் தோண்டுதலாகவே இந்திய அகழ்வாராய்ச்சிகள் இருப்பதால் கருதுகோளிற்கு அறிவியல் பூர்வ ஆதாரங்கள் கிடைக்காமலே போகலாம். ஆனால் ஆண்டாண்டு காலங்களாய் இவற்றிற்கான ஆதாரங்கள் சமூக அரசியல் தளங்களில் கிடைத்துக் கொண்டேதான் இருக்கின்றன. என் குருநாதர் வினையூக்கி தனது பேஸ்புக் முகப்பில் இவ்வாறு எழுதியிருந்தார். 

"அன்றும் இன்றும் என்றும் என்றென்றும் வடக்கை அலறவைப்பது ஒன்றே ஒன்று ... தமிழ்" 

இந்தியம், சைவம், வைணவம் , காந்தியம், சமூகநீதி என அனைத்தையும் தாண்டி வடக்கத்தியர்கள் தமிழர்கள் நலன் சார்ந்த விசயம் என்றால் வரிந்து கட்டிக்கொண்டு வடக்கு என்ற சந்திப்பில் ஒன்று சேர்கின்றனர். இந்த வன்மம் , வெறுப்பா , பயமா , எரிச்சலா எனத் தெரியவில்லை. ஒருவேளை தெற்கின் கையோங்கியிருந்த காலங்களில் வடக்கில் அன்றைய 'ஆளும் சமூகத்தின் மீது' அமெரிக்கத்தனமாக தமிழர்கள் நடந்து கொண்டிருப்பனரோ என்ற எண்ணம் வராமாலுமில்லை. சிங்களவர்களைக் அடக்கி ஒடுக்கி வைத்திருந்த சென்ற நூற்றாண்டு ஈழத்தமிழர்கள், இந்தத் தருணத்தில் நினைவுக்கு வருவது இயல்பு. வரலாற்றுக் காயத்தின் வன்மம், 
வாய்வழிக்கதைகள் வழி மட்டுமல்லாது ஜீன்களின் வழியாகவும் கடத்தபட்டிருக்குமோ!! 

தமிழர் சாராத பிரச்சினைகளின் ஆங்கில ஊடக விவாதங்களைப்பாருங்கள். கொஞ்சம் முன்னபின்னே இருந்தாலும் ஓரளவிற்கு நியாயமான வழிநடத்தலுடன் மட்டுறுத்தலுடன் விவாத ஒழுங்கு இருக்கும். ஆனால் காவிரி நதி நீர்ப்பிரச்சினையாகட்டும், 
முல்லைப்பெரியாறு ஆகட்டும், ஈழப்பிரச்சினையாகட்டும் , கூடங்குளமாகட்டும் நடுவரே கையில் ஒன்றிற்கு இரண்டாய் கைத்தடிகளுடன் தமிழருக்காகப் பேசுபவரை முதல் வார்த்தையில் இருந்து திட்டித்தீர்ப்பார். அட ஆக்கப்பூர்வ விசயங்களை விடுங்கள், 
பொழுதுபோக்கு கிரிக்கெட்டை எடுத்துக் கொள்ளுங்கள். வடக்கத்தியர்களுக்கான மற்றொரு அணியான சென்னை சூப்பர் கிங்ஸை கரித்துக் கொட்டுவதன் நோக்கம் அதன் தளம் தமிழ்நாடு, நிர்வாகிகள் தமிழர்கள். 

வங்கிகள் நாட்டுடமையாக்கப்பட்டு இன்று சிறப்பாக செயற்படுகின்றன, நல்லவிசயம்தான். ஆனால் வங்கிகள் நாட்டுடைமையாக்கப்பட்டதற்கான முழுமுதற்காரணம் அன்று வங்கிகள் முழுக்க முழுக்க தென்னிந்தியர் கைவசம் , அதில் பாதி 
தமிழர்கள் வசம்இருந்தன. உலகக்கோப்பை போட்டிகளுக்குப்பின்னர் வரும் கிரிக்கெட் தொடர்களை , மக்கள் நினைவில் கொள்வதில்லை. கலவிக்குப்பின்னரான அயற்சியை ஒத்த மனநிலையில் ரசிகர்கள் இருப்பார்கள். அதைப்போல விடுதலைக்குப்பின்னர் தெற்கத்தியர் சுதந்திர மோகத்தில் இருந்த காலத்தில் , அவர்கள் ஹிந்'தீ'யாய் வேலைபார்த்து, பொருளாதாரக்குடுமியை பிடுங்கி தன் 
வசம் வைத்துக்கொண்டது அவ்வளவாகக் கண்டு கொள்ளப்படவில்லை. குடும்பக்கட்டுப்பாடு விளம்பரங்கள் தெற்கில், குறிப்பாக தமிழகத்தில் அடிமட்டம் வரைக் கொண்டு செல்லப்பட்டதைப்போல வடக்கில் இருந்ததில்லை. அங்கு குடும்பக்கட்டுப்பாடு உறை என்றால் வாயால் ஊதி காற்றில் பறக்கவிடப்படும் பலூன் என்ற அளவில்தான் தெரிந்து இருந்தது. 

இத்தனையையும் மீறி தமிழர்கள் தமிழர்களாக இருப்பதன் காரணம் அவர்களின் திமிர்த்தனமும் திமிறும்தனமும் தான். சோற்றாலடித்தப் பிண்டமான தமிழன் கால்வயிறு அரைவயிறு கிடைக்கும்வரை பிரச்சினை தராமல் இருந்துகொண்டு, கடைசிக் கோவணத்தை உருவ வரும் வரை யார்வந்து அடித்தாலும் ஆண்டாலும் கருமம் கமலஹாசன் ரகளை ரஜினிகாந்த் என அமைதியாய் இருப்பான். எலியை விரட்டிக் கொண்டே போங்கள் , ஓரிடத்தில் போய் தன் பற்களைக் கோரமாகக் காட்டி எதிர்த்து நிற்கும். அத்தகைய சூழல்கள் வந்தால் மட்டும் தமிழர்களுக்கு 
கும்பகர்ணத்தூக்கம் போகும். இந்தித்திணிப்பு என்ற அரசாங்க உத்தரவு வந்தபொழுது எலிகள் புலிகள் ஆகின. எலிகள் புலிகளானால் மட்டுமே செவிமடுக்கப்படும். தமிழ் காகபட்டர்கள் , அனுமன்களாவர். 

விடுதலைக்கு முன்னரான திணிப்பின் சூத்திரதாரியான ராஜாஜி, இரண்டாம் திணிப்பின்போது தமிழர்களுடன் நின்றது வரலாற்று சுவாரசியம். குல்லுகபட்டர் , காகபட்டராய் அண்ணாதுரையுடன் இணைந்தார். இந்தித் திணிப்பைப் பார்த்து 'எனக்கே பிரிவினை 
எண்ணம் வந்துவிட்டது' என்று திருச்சி திமுக மாநாட்டில் ராஜாஜி பேசினார். பெரியார் , அண்ணாவினால் தமிழ் எலிகள் புலிகளாய் 
மாறிய சென்னை மாநிலம் பற்றி எரிய பாகிஸ்தானையே நடுநடுங்கச் செய்த ,லால்பகதூர் சாஸ்திர் இறங்கி வந்தார். நேரடி 
இந்தித்திணிப்பு நிறுத்தப்பட்டது. அன்றைய காங்கிரஸ்காரர்கள் புத்திசாலிகள். விடாக்கொண்டனாய் மொழிக்கொள்கையைத் திணித்து 
இருந்தால் உடனடி வெற்றி இந்தியத்திற்கு கிடைத்து இருந்தாலும் , சுயாட்சி தனித்தமிழகம் என்ற எண்ணங்கள் அடுத்தத் தலைமுறைக்கு வீரியமாய் கடத்தப்பட்டிருக்கும். பத்து பதினைந்து ஆண்டுகளில் இந்தியா சிப்பாய்கலகத்தின் காலங்களில் இருந்த 
இந்தியத் துணைக்கண்டமாக மாறியிருந்து இருக்கும். 

விட்டுக்கொடுத்தல் பின்னர் மெல்ல நஞ்சைக் கலக்கல் என்ற இந்திய இயந்திரத்தின் ஆதி 'மனு' அறிவு, காங்கிறஸைத் தோற்கடித்து, மோடியை பிரதமர் ஆக்கவேண்டும் என்ற கண்மூடித்தனமான இராமபக்தியில் மங்கிவிட்டதோ என்று தோன்றுகின்றது. 
பெருந்தன்மையைக் காட்டி இந்தியத்தை , தொலைக்காட்சித்தொடராய் அடுத்தத் தவணைக்கு நீட்டிப்பதை விட்டுவிட்டு எழுவருக்கு 
எதிராக அரசாங்கம் தடை வாங்கியிருப்பது உண்மையில் வடக்கத்தியர்களைக் காட்டிலும் தமிழர்களுக்குத்தான் மகிழ்ச்சியைக் கொடுக்கவேண்டும். 

மாலிக்காபூரை மதுரைக்குக் கொண்டு வந்த காலம் தொட்டு, எழும் தீப்பொறிகள் கண்ணிமைக்கும் நேரத்தில் அணைந்துப்போய்க்கொண்டிருக்கையில், வென்றாலும் தோற்றாலும் கிடைத்திருக்கும் எழுவர் விடுதலை என்பது ஓர் அட்டகாசமான 
துருப்புச்சீட்டு. இந்தியத்திற்கு திட்டித்தீர்த்தவுடன் இருக்கும் எரிச்சலுக்குப்பின்னர் பயம் வரும். பயம் காரணமாக கடைசி நேரத்தில் காகபட்டர்களினால், இந்தியம் இறங்கிவருதலை மனமுவந்து ஏற்றுக்கொண்டு மீண்டும் எலிகள் ஆகிவிடாமல் அடுத்தத் தலைமுறைக்கு வரலாற்றைக் கடத்துங்கள். யார் கண்டது, ஆழத்தோண்டி இமயவரம்பனை மீட்டு எடுக்கலாம். குரலை உயர்த்துங்கள்.

மண்ணும் 

மனிதமும் இருப்பதால் தமிழகத்தின் மீதான பன்னாட்டு அரசுகளின் விருப்பம் அதீதமானது. ஆக மூட்டைப்பூச்சியை நசுக்குவதைப்போல காஷ்மீரத்தை நசுக்குவதைப்போல தமிழகத்தை நசுக்க முடியாது. பத்து பேர் சேர்ந்தால் கும்பல். நூறு பேரானால் கூட்டம். நூறாயிரம் ஆனால் எழுச்சி. கோடியானால் அது மறுமலர்ச்சி. தமிழ்க்கும்பல் என்று கேலி செய்த, அந்தக்கால ராஜாஜி போன்ற தமிழ் காகபட்டர்கள் வரப்போகும் தமிழ் மறுமலர்ச்சியில் துண்டு போட, ஏற்கனவே தமிழ் பேச ஆரம்பித்துவிட்டார்கள். 
அவர்கள் இப்பொழுது பேசட்டும். கூடிவாழ்ந்து கோடிநன்மையாகப்போகும் அடுத்தத் தலைமுறையில் நமக்கான காக்காசூத்திரர்களை நாம் உருவாக்கிவிடலாம்.

-கிளிமூக்கு அரக்கன்

Wednesday, February 19, 2014

கலைஞர் ஏன் 2000ல் நளினியை மட்டும் காப்பாற்றினார்? -டான் அசோக்




கலைஞர் ஏன் நளினியை மட்டும் 2000ல் தூக்கில் இருந்து காப்பாற்றினார் மற்ற மூவரைக் காப்பாற்றவில்லை எனக் கேள்வி கேட்போர் சில விஷயங்களைப் புரிந்துகொள்ள வேண்டும்.

ஏற்கனவே அமைதிப்படையை வரவேற்கச் செல்லாததைக் காரணம் காட்டியும், புலி ஆதரவாளர் என்பதைக் காரணம் காட்டியும் ஜெ-சந்திரசேகர்-சுஸ்வாமி கூட்டணியால் 1989ல் கலைஞர் ஆட்சி கலைக்கப்பட்டிருந்தது. அதன்பின் 1991ல் ராஜீவ் கொலைக்காக, ராஜீவ்வின் குடும்பத்தைவிட அதிகமாகத் துடித்தார்கள் தமிழர்கள். அதற்காக ஈழ (புலிகள்) ஆதரவுக் கட்சி என்ற ஒரே காரணத்திற்காக திமுகவை 1991ல் ஒரே ஒரு சீட்டில் மட்டுமே ஜெயிக்க வைத்து படுபயங்கரமாக தண்டித்தார்கள் தமிழர்கள். பிறகு ராஜீவ்வின் மரண அலையில் மிதந்தபடி ஜெ ஆட்சிக்கு வருகிறார். வந்தவுடன் முழுமூச்சாக புலிகளை தீவிரவாதிகளாக அறிவிக்கும் செயலிலும், இந்தியாவில் புலி அமைப்பிற்கு தடை வாங்கும் முயற்சியிலும் ஈடுபட்டு ஜெயிக்கிறார். தமிழ்மக்கள் கிஞ்சித்தும் கொந்தளிக்கவில்லை.

1996ல் திமுக வெற்றிபெற்ற பின்னரும் கூட தமிழகத்தில் புலி ஆதரவான சூழல் அமையவில்லை. மக்கள் ராஜீவ் கொலையை மன்னிக்கத் தயாராக இல்லை. அதனால் ஜெவின் புலி மற்றும் ஈழ எதிர்ப்பு அதே சூட்டுடன் தொடர்கிறது. தொடர்ந்து ஈழ எதிர்ப்பு வேலைகளைச் செய்கிறார். தற்போது கொந்தளிக்கும் வைகோ, நெடுமாறன், இதர இதர வாதிகள் யாரும் ஜெவை எதிர்க்கவில்லை.

இப்படியொரு சூழ்நிலையில் தான் 2000ல் நளினியின் தூக்கு தண்டனையை கருணையின் அடிப்படையில் ரத்து செய்யவேண்டும் என திமுக அமைச்சரவை பரிந்துரை செய்கிறது. இதில் சில விஷயங்களை நாம் கவனிக்க வேண்டும்.

a)திமுக தீவிரவாதிகளை ஆதரிக்கிறது என ஜெ கடுமையாக தாக்கி பல அறிக்கைகள் கொடுத்தார். அந்த அறிக்கையை யாரும் எதிர்க்கவில்லை. தமிழக பொதுமனநிலை புலிகளுக்கு எதிராகத்தான் அப்போது இருந்தது.

b)ஏன் மற்ற மூவரின் தண்டனையைக் குறைக்க பரிந்துரைக்கவில்லை என்ற கேள்வி பொதுச்சூழலில் எழவே இல்லை.

c)ஏற்கனவே புலிகளின் கூட்டாளி என்ற குற்றச்சாட்டால் ஆட்சியை இழந்த திமுக மீண்டும் அதே தவறை செய்யத் துணிகிறது. அதாவது பொதுமனநிலைக்கு எதிராக நளினியை தூக்கில் இருந்து காப்பாற்றுகிறது. அந்த காலகட்டத்தில் இது கிட்டத்தட்ட தற்கொலைக்கு சமம். ஆனாலும் திமுக அதை நிறைவேற்றுகிறது.

d) (இதுதான் மிக மிக மிக முக்கியமான விஷயம்) இப்போது உச்சநீதிமன்றம் மூவரையும் நிரபராதிகள் என்ற ரீதியில் தூக்கு தண்டனையை நிறுத்தவில்லை. கருணை மனுவை பரிசீலிக்க ஜனாதிபதி(கள்) தாமதப்படுத்தியதால் நிறுத்தியிருக்கிறது. ஆனால் 2000ல் அவர்களுக்குத் தண்டனை கிடைத்து 2 ஆண்டுகளே ஆன சூழ்நிலையில், திமுக என்ன காரணத்தைச் சொல்லி அவர்களை தூக்கிலிருந்து காப்பாற்ற முடியும்? கருணைக்கு காரணமாக எதைக் காட்ட முடியும்? நளினிக்கு மட்டும் தான் குழந்தை என்ற சரியான காரணம் இருந்தது.  அதனால், ஏன் மற்ற மூவரை 2000ல் கலைஞர் காப்பாற்றவில்லை எனக் கேட்பது பைத்தியக்காரத்தனமான கேள்வி, கலைஞரை குற்றம் சாட்டவேண்டும் என்றே முன்வைக்கப்படும் வன்மமான, லூசுத்தனமான கேள்வி. 

ஆக, கலைஞரை குறை சொல்வதும், வன்மத்தை உமிழ்வதும் வைகோ, சீமான், நெடுமாறன் போன்ற ’வாய்மாறி அரசியல்வாதி’களுக்கு பிழைப்பாக இருக்கலாம். ஆனால் நம்மைப் போன்ற சராசரி மக்கள் குறைந்தபட்சம் வரலாற்றையாவது தெரிந்துகொள்ள வேண்டாமா? துவக்க காலத்தில் இருந்தே திமுக மரணதண்டனைக்கு எதிரான கட்சி. கலைஞர் பல சூழ்நிலைகளில் மரண தண்டனையை எதிர்த்துக் குரல் கொடுத்திருக்கிறார். நளினியை 2000லேயே காப்பாற்றிய அவரை இந்த விஷயத்தில் குறை சொன்னால் அதைவிட மோசமான அரசியல் அறிவின்மை எதுவுமே இருக்க முடியாது. அப்படியும் கோபத்தைக் காட்டியே தீர வேண்டும் என நினைத்தால் நளினி காப்பாற்றப்பட்டபோது வெகுண்டெழுந்த, மூவரையும் காப்பாற்றவேண்டும் என சட்டசபையில் தீர்மானம் போட்டுவிட்டு நீதிமன்றத்தில் பல்டி அடித்த ஜெவிடம் சென்று காட்டுங்கள். ஏனென்றால் பந்து இப்போது அவர் பக்கம் இருக்கிறது!

Saturday, February 15, 2014

சீமான் புராணங்கள்: 1 முதல் 5 வரை -டான் அசோக்

சீமான் புராணம் 1 : கிமு இரண்டாம் நூற்றாண்டில், விடுதலைப் புலிகள் தளபதி பால்ராஜ் ஒரு மலையகத் தமிழர் என புலிகளின் தமிழக மொத்தவிலை ஏஜன்ட்டான சீமான் புதிய தலைமுறையில் தெரிவித்தார். ஆனால் பால்ராஜோ பரிசுத்த ஈழத்தமிழர்! இதை நான் கேள்வி எழுப்பிய போது, இங்கே இருக்கும் நாம் தமிழர் கட்சியின் அதிகாரபூர்வ இணைய ஒருங்கிணைப்பாளர் ஒருவர், “பால்ராஜ் மலையகத் தமிழர் தான் என்பதை நிரூபிக்கிறேன். நிரூபித்தால் என்ன வேண்டுமானாலும் செய்வாயா?,” என முழங்கினார். நானும் ஒப்புக்கொண்டேன். அவரும் தன் சைக்கிளில் ஒலிபெருக்கியைக் கட்டிக் கொண்டு சுவர் சுவராகச் சுற்றி “அண்ணே ராமசாமி அண்ணே... பால்ராஜ் மலையகமா, ஈழமாண்ணே?” என வருவோர் போவோரிடமெல்லாம் கேட்டுக்கொண்டிருந்தார். எல்லோரும், ”பாக்க போராளி மாதிரி இருக்க... என்னப்பா இப்படிக் கேட்டுட்ட...  பால்ராஜ் ஈழத்தமிழர் தான்பா!” என மானக்கேடாக கேள்வி கேட்டுவிட்டதால் பின் அடங்கிவிட்டார். இது முதல் வரலாறு.

சீமான் புராணம் 2: கிமு மூன்றாம் நூற்றாண்டில் “எம்.ஜி.ஆர் முதல்வராக பதவியேற்றபோது அந்த விழாவில் பெரியார் சக்கரநாற்காலியில் வந்து கலந்து கொண்டார்.” எனச் சொல்லி ஒரு வரலாற்றுப் புனைவைப் புனைந்தார். எம்.ஜி.ஆர் பதவியேற்றது 1977ல், பெரியாரோ 1973லேயே இறந்துவிட்டார் என்ற உண்மையை சுபவீ சொன்னதும் சீமான் தரப்பில் இருந்தோ, நாம் தமிழர் புலிப்பாண்டிகள் தரப்பில் இருந்தோ இதுவரை எந்த உறுமலும் இல்லை.

சீமான் புராணம் 3: விஜய் படவாய்ப்பு கிடைப்பதைப் போல, கிமு ஒன்றாம் நூற்றாண்டில் சீமானுக்கு ஒரு பிரம்மை ஏற்பட்டிருக்கிறது. உடனே, தேசியத் தலைவர் பிரபாகரனுக்குப் பிடித்த நடிகர் விஜய் தான் என்றும், அதை பிரபாகரனே தன்னிடம் சொன்னார் என்றும் மேடையிலேயே கதை எழுதினார். ஆனால் எப்படியோ விஜய் உஷாராகி பகலவனில் இருந்து தப்பித்துவிட்டார்.

சீமான் புராணம் 4: யாரையும் காதலிக்கவும், கைப்பிடிக்கவும் யாருக்கும் உரிமயுண்டு. ஏன் சிங்களப்பெண்ணை திருமணம் செய்தால் கூட அது தமிழர் விரோதமெல்லாம் ஆகாது. சிங்களர்களிலும் எவ்வளவோ நல்லவர்கள் இருக்கிறார்கள். காதல் யார்மீதும் வரும். ஆனால் தான் காதலில் விழுந்தாலோ, திருமணம் செய்தாலோ அதற்கும் கூட ஈழப்போராட்டம் தான் காரணமாக இருக்க வேண்டும் என்ற இலட்சிய வேட்கையுடன் இயங்குபவர் அண்ணன் சீமான். அந்த வகையில் காளிமுத்துவையும் ஈழப்போராளிகள் லிஸ்டில் சேர்க்க வேண்டிய அத்தியாவசியக் கடமை சீமானுக்கு ஏற்பட்டது. அதனால், “பிரபாகரனைத் தூக்கிலிடவேண்டும் என ஜெ தீர்மானம் இயற்றியபோது சபாநாயகராக கண்ணியத்துடன் அமர்ந்து வேடிக்கை பார்த்த காளிமுத்துவையும் ஈழப்போராளிகள் லிஸ்டில் சேர்த்தார். பற்றாக்குறைக்கு ஆனையிரவு போரின் போது புலிகள் காளிமுத்துவிடம் தான் அறிவுரை கேட்டார்கள் என்ற எக்ஸ்ட்ரா பிட்டையும் சேர்த்துப் போட்டு ஒருவழியாக தன் இலட்சியத்தை நிறைவேற்றிக் கொண்டார்.

சீமான் புராணம் 5:   இது நேற்று நடந்த ஒரு சீமான் வகையறா வரலாற்றுச் சம்பவம். பாலுமகேந்திரா நல்ல இயக்குனர்தான். அருமையான படைப்பாளி. ஆனால் அவருக்கு இரங்கல் தெரிவிக்க வேண்டுமென்றால் கூட அவரையும் ஈழப்போராளிகள் லிஸ்டில் சேர்க்க வேண்டும் என்ற சீமானின் கடமையுணர்ச்சிதான் நம்மை மெய்சிலிர்க்க வைக்கிறது. காசி அனந்தன் சைக்கிளை மிதித்துக்கொண்டு சிங்கள வீதிகளிலே விரைவாகப் போவாராம். பின்சீட்டில் அமர்ந்திருக்கும் பாலுமகேந்திரா கையெறி குண்டுகளை வீசியபடியே வருவாராம்! பாலுமகேந்திரா இலங்கையில் இருந்த காலத்தில் அங்கு ஆயுதப்போராட்டமே துவங்கவில்லை என்பதுதான் உண்மை. இறந்தவரைப் பற்றி பொய்சொல்லித்தான் பாராட்டவேண்டுமா? இதைவிட ஒரு அசிங்கம் இறந்தவருக்கு இருக்க முடியுமா?

தன்னுடன் ஒண்ணாங்கிளாஸ் படித்தவர்களில் இருந்து, தனக்கு கார் ஓட்டும் டிரைவரில் இருந்து, தான் இரங்கல் தெரிவிக்கும் இறந்தவர்கள் வரை அனைவருமே கண்டிப்பாக ஈழப்போராளிகளாக இருக்க வேண்டும் என்பதுதான் அண்ணனின் வாழ்நாள் இலக்கு. இல்லையென்றால் அவரே ஒரு கதையை உருவாக்கி, காட்சியமைத்து ‘ஈழபோராளி’யாக பதவியுயர்வு கொடுத்துவிடுவார். கூட்டிக் கழித்துப் பார்த்தால் தெரிந்தோ தெரியாமலோ ஈழப்போராட்டத்தையே இழிவு செய்யும் செயல்களைத் தான் சீமான் தொடர்ந்து செய்வருகிறார். இவரைப் போன்றவர்களைக் கண்டிக்கவாக வேணும் ஈழத்தமிழர்களிலிருந்து ஒரு இயக்கம் மீண்டும் உருவாக வேண்டும். உருவானால் அவர்கள் இலக்கு யாராக இருக்கும் என்பதை படிப்போரின் யூகத்திற்கே விட்டுவிடுகிறேன். 

Friday, February 14, 2014

காதலர் தினக் கோமாளிகள் - கிளிமூக்கு அரக்கன்


மசூதியை இடிப்பவர்களும், மசூதியை இடித்ததற்காகப் போராடியவர்களும் கைகோர்க்கும் இடம் ஒன்று உண்டு. இருவருக்குமே கலாச்சாரக் காவல் என்றால் மிகவும் பிடிக்கும். ஓரினச்சேர்க்கையினருக்கு எதிரான நீதிமன்றத் தீர்ப்பானாலும் சரி, பெண்கள் உடை விஷயம் என்றாலும் சரி, காதலர் தினக் கொண்டாட்டமானாலும் சரி, குல்லாயும்-காவியும் கட்டித் தழுவிக் கொள்ளும். 

காதலர் தினம் என்றால் காதல் என்னும் இயற்கையான மனித உணர்வைக் கொண்டாடும் தினம். அன்னையர் தினத்தைப் போல, தந்தையர் தினத்தைப் போல ஒரு நினைவுகூர் தினம். எப்படி ஆண்டு முழுதும் அம்மா பாசமாக இருக்கிறாரோ, அப்பா பாசமாக இருக்கிறாரோ அதேபோல... ஆண்டுமுழுதும் உலகின் எல்லா மூலைகளிலும் காதலர்கள் காதலித்துக் கொண்டுதான் இருக்கிறார்கள், ஒத்துவராமல் பிரிந்துகொண்டு தான் இருக்கிறார்கள், ஆண்டு முழுவதும் உடலுறவிலோ, காமக்கலைகளிலோ ஈடுபட்டுக்கொண்டுதான் இருக்கிறார்கள், ஆண்டுமுழுதும் அன்பைப் பறிமாறிக் கொண்டுதான் இருக்கிறார்கள், ஆண்டுமுழுவதும் தங்கள் காதலை பழமைவாதத்திடமிருந்து காக்க போராடிக் கொண்டு தான் இருக்கிறார்கள், காதலில் விழுந்துகொண்டே தான் இருக்கிறார்கள், திருமணம் செய்துகொண்டே தான் இருக்கிறார்கள். ஆனால் ஆண்டில் ஒரே ஒரு நாளை இதையெல்லாம் நினைவுகூர்வதற்காக ’காதலர்தினம்’ என்ற தினத்தை சிறப்புதினமாக, ஒரு குறியீடாகப் பயன்படுத்திக் கொள்கிறார்கள். ஆனால் இந்த காதலர் தினத்தை, அதாவது ஒரே ஒரு தினத்தை ஒழித்துவிட்டால் காதலை ஒழித்துவிடலாம், காதலில் பிரிதலை ஒழித்துவிடலாம், பழைய காதலை மறந்து புதிய காதலில் புகும் மனிதனின் இயற்கை குணத்தை ஒழித்துவிடலாம் என கலாச்சாரம், மதம் ஆகிய கூறுகளால் மனநலம் பாதிக்கப்பட்ட சில கூட்டங்கள் அலைந்து கொண்டிருக்கின்றன. அன்னையர் தினத்தை நிறுத்திவிட்டால் தாய்ப்பாசம் உலகில் நின்றுபோகுமா? 

கடவுள், மதம், மொழி என எதுவும் தோன்றுவதற்கு முன்பே காதல் உருவாகிவிட்டது. ஆதாமும் ஏவாளும் உடலுறவு கொண்டபின் தள்ளிப் போய்விடவில்லை, காதலுடன் கட்டிக்கொண்டே தான் அலைந்தார்கள். காதல் என்பதற்கான அர்த்தம் ஒவ்வொருவனுக்கும் ஒருமாதிரியாக இருப்பது. சிலருக்கு காமம் தான் காதல். சிலருக்கு காமமே இல்லாத அன்புதான் காதல். சிலருக்கு காமமும், அன்பும் இணையும் புள்ளிதான் காதல். அவ்வளவு ஏன்? நம்முர் கலாச்சாரத்தில் நிச்சயிக்கட்ட திருமணம் செய்துகொள்வோர்க்கு உடல் இணையும் முதலிரவு தான் காதல்! இப்படி காதலை ஒரு வரையறைக்குள் அடக்கவே முடியாதபோது, ‘தாலி கட்டினால்தான் காதல்’ எனத் தாலியுடன் தரகர் போல அலையும் தறுக்கர்களையும், கற்பை காதல் கெடுக்கிறது எனப் போஸ்டர் ஒட்டி அலையும் கோமாளிகளையும் என்ன செய்வது? மனித இனத்திற்கு அப்பாற்பட்ட இந்த ஜந்துக்களுக்கு காதல் என்னும் மனித இயல்பை பொத்தாம் பொதுவாகப் புரியவைக்க வேண்டுமானால், நாம் இந்தியக் கலாச்சாரமாக அறியப்படும் ’நிச்சயிக்கப்பட்ட திருமணம்’ என்ற கருத்தியலை பகுப்பாய்வு செய்துபார்த்தல் அவசியம். 

பெட்டை நாய்களை பருவகாலத்தில் ஆண் நாய்களுடன் கூடுவதற்காக அதன் உரிமையாளர்கள் கூட்டிச் செல்வார்கள். ஆண் நாயின் சாதி, உயரம், எடுப்பு, அதன் பரம்பரை பெருமை ஆகியற்றையெல்லாம் ஆராய்ந்து முடிவு செய்து ஒரு சுபயோக சுபதினத்தில் இரண்டு நாய்களையும் கூட வைப்பார்கள். அவைகளும் பருவ நேர இயற்கை உந்துததாலும், குட்டி ஈனுவதற்காகவும் கூடிக்கொள்ளும். கூடி முடிந்தபின் அதனதன் வீட்டிற்குச் சென்றுவிடுவார்கள். பிறகு அடுத்த பருவத்தில் தான் கூடல். 

மனிதனின் திருமணக் கதையும் இதே போன்றதுதான் என்றாலும் மனிதன் இதிலிருந்து கொஞ்சம் வித்தியாசப்பட்டவன். அவனுக்கு வருஷமெல்லாம் வசந்தம் தான்! வருஷமெல்லாம் குட்டி ஈனுவதற்கும், உடலுறுவு கொள்வதற்கும் எந்நேரமும் தயாராக இருப்பவன் மனிதன். அதனால் அவனுக்குப் பருவ வயது வந்தவுடன் ஜோடி சேர்ப்பதற்காக பருவமெய்திய மற்றொரு மனிதனைத் தேடுவார்கள். சாதி, அழகு, உயரம், பரம்பரை பெருமை, குடும்பப் பெருமை ஆகியற்றையெல்லாம் ஆராய்ந்து முடிவு செய்து ஒரு சுபயோக சுபதினத்தில் கட்டிலறைக்குள் தள்ளுவார்கள். பருவம் தரும் இயற்கை உந்துததாலும், திருமணம் ஆகிவிட்ட காரணத்தாலும் இருவரும் கூடுவார்கள். ஆனால் நாய்கள் போல ’வேலை முடிந்தபின்’ அவரவர் வீட்டிற்குச் செல்லாமல், வருஷமெல்லாம் வசந்தம் என்பதால் தனியாகத் தங்கி தனிக் குடும்பத்தை உற்பத்திசெய்து வளர்ப்பார்கள். உடலுறவு தரும் சுகம், காதலோ என ஐயம் கொள்ளும் அளவிற்கு கொஞ்சநாளைக்கு அவர்களுக்குள் ஒரு ஈர்ப்பைத் தரும். சில அதிர்ஷ்டசாலி ஜோடிகளுக்கு, புரிதல் ஏற்பட்டபின் இந்த உடலுறவு ஈர்ப்பு காதலாக மாறும். அப்படி மாறாத ஜோடிகள் திருமணம் என்ற பந்தத்தில் இணைந்த பாவத்திற்காகவும், குழந்தை பெற்றுக்கொண்ட பாவத்திற்காகவும், பிரிந்துபோதலைப் பாவமெனச் சொல்லும் தரங்கெட்ட சமூகத்திற்கு பயந்தும், ஒன்றாக வாழ்ந்தே காலத்தைத் தள்ளுவார்கள். காமமும் அன்பும் கலக்கும் புள்ளிதான் காதல் என்பதே தெரியாமல் வாழ்ந்து ஒருநாள் செத்தும் போய்விடுவார்கள். சமூகம் கட்டமைத்திருக்கும் நிச்சயிக்கப்பட்ட திருமண-பந்தத்தின் சிக்கல் இதுதான். 
மனிதனின் இயற்கையே நிச்சயித்த திருமணங்களுக்கு எதிரானது. காதல் இயற்கையாக ஏற்படுவது. 
1) மன ஈர்ப்போ, உடல் ஈர்ப்போ ஏற்படுகிறது. 
2)அன்பு பரிமாறப்படுகிறது. 
3)காமமும், அன்பும் ஒரு புள்ளியில் இணைந்து காதலாக மாறுகிறது. 
4) வாழ்க்கை நகர்கிறது. 
5)மற்ற பரிமாணங்கள் தெரிகிறது. 
6)அவையாவும் ஒத்துவந்தால் சட்டவசதிக்காக, சமூக வசதிக்காக திருமணமாகிறது. 7)இல்லையெனில் உறவு முறிகிறது. 
8)மீண்டும் எண் ஒன்றைப் படிக்கவும். 

இவ்வளவுதான் காதல். இதுதான் இயற்கை. இதற்கு மாறாக, பருவமெய்துவிட்ட காரணத்தாலும், சம்பாதிக்கத் துவங்கிவிட்ட காரணத்தாலும் திடீரென யாரோ ஒரு மூன்றாவது மனிதரை செய்துகொள்ளும் திருமணம் இயற்கையானதல்ல. கலாச்சாரம், கலாச்சாரம் என்று வகுப்பெடுக்கிறார்களே, நேரடியாக முதலிரவில், உடலுறவில் வாழ்க்கையை முளைக்க வைப்பதைவிடவா ஒரு கலாச்சாரச் சீரழிவு இருக்க முடியும்? 

ஆர்.எஸ்.எஸ் போன்ற சமூக பயங்கரவாத அமைப்புகள் இருதார மணங்களை எதிர்ப்பதில்லை, வன்புணர்வுகளுக்கு எதிரான பொங்கியிருக்கிறார்களா என்றால் இல்லை, பெண்களுக்கு எதிரான வன்முறைகள் தவறு எனக் கண்டித்திருக்கிறார்களா என்றால் இல்லை, ஊழலுக்கு எதிராக, மலத்தை வாயில் திணிக்கும் சாதியத்திற்கு எதிராகப் பொங்கியிருக்கிறார்களா என்றால் இல்லை. மதத்தையும்-சாதிய கட்டமைப்பையும், சாதி உணர்வையும் நிச்சயித்த திருமணங்களால் மட்டுமே தலைமுறை தலைமுறையாகக் கடத்த முடியும் என்பதில் தெளிவாக இருப்பதனால்தான் காதலை எதிர்க்கிறார்கள். தாலி கொடுத்து கட்டச் சொல்வது காதலர்களை கணவன்-மனைவிகளாக ஆக்கும் நல்லெண்ணத்தில் அல்ல. (அப்படி நல்லெண்ணம் இருந்தால் ஒரு அமைப்பை நிறுவி “எந்த மதம், சாதியைச் சேர்ந்த காதலர்களானாலும் வாருங்கள். நாங்கள் திருமணம் செய்துவைப்போம்” என அறிவிக்கட்டுமே பார்ப்போம்!!!) அவர்கள் நோக்கம் காதலர்களை பயப்பட வைப்பது, மனரீதியாகத் துன்புறுத்துவது மட்டுமே. அடுத்த வருடம் திருமணம் செய்யலாம் என சிலர் இருப்பார்கள், வேலை கிடைத்தபின் வீட்டில் சொல்லலாம் என சிலர் காத்திருப்பார்கள், சிலர் இந்தக் காதல் எவ்வளவு தொலைவு போகிறதோ போகட்டும் என இருப்பார்கள், சிலர் இதே காதல் இரண்டு வருடங்கள் தொடர்ந்தால் திருமணம் செய்யலாம் என்றிருப்பார்கள். அட, அவர்கள் காமத்திற்காக காதலிப்பவர்களாகவே இருக்கட்டுமே? இரு வயதுவந்தவர்கள் மனமுவந்து என்னவேண்டுமானாலும் செய்துவிட்டுப் போகிறார்கள், உனக்கென்ன வந்தது? உன்னையா புணர்ச்சிக்கு அழைத்தார்கள்? உங்கள் புராணங்களைவிட, பாஞ்சாலியின் ஐவர் படையை விட, கிருஷ்ணனின் லீலைகளைவிட, மனிதர்களின் காதல் எந்த விதத்தில் குறைந்துபோய்விட்டது? 

அதே நேரம் இந்தப் பக்கம் பார்த்தால், ’காதல் கற்பை நாசம் செய்கிறது,’ ‘காதலர் தினம் என்பது காமுகர்களின் வேலை’ என்றெல்லாம் போஸ்டர் ஒட்டிக்கொண்டு அலைகின்றன தவ்ஹீத் ஜமாத் போன்ற அமைப்புகள். அப்படிப்பட்ட அறிவுஜீவி, தீவிர மதவாத அமைப்புகளிடம் நான் கேட்க விரும்பும் அதிமுக்கியமான கேள்வி, ’கற்பு என்றால் என்ன?’ என்பது! 

1) கற்பு என்பது ஆண்பாலா, பெண்பாலா? அல்லது இருபாலுக்கும் பொதுவானதா?
2)கற்பு என்பது ஆண்பால் என்றால் பலதார மணங்களை எப்படி இஸ்லாத் அனுமதிக்கிறது? 
3) கற்பு என்பது பெண்பால் என்றால் விவகாரத்துக்களையும், பெண் மறுமணத்தையும் இஸ்லாத் எப்படி ஆதரிக்கிறது? 
4) கற்பு என்பது திருமணத்திற்கு முன்பு உடலுறவில் ஈடுபடாமல் இருப்பதா?
5) பல திருமணங்களை அனுமதிக்கும் இஸ்லாத்தில், விவாகரத்தை எளிதாக அருளும் இஸ்லாத்தில், முதல் திருமணத்திற்கு முன்பு எப்படியோ கஷ்டப்பட்டு கற்பை காத்துக் கொள்கிறார்கள் சரி, இரண்டாம் திருமணத்தின்போது முதல் திருமணத்தால் கற்பு பறிபோய், கற்பின்றிதானே இருப்பார்கள். அது தவறில்லையா? இல்லை மீண்டும் கற்பை புதுப்பித்துக்கொள்ள இஸ்லாம் எதும் வழிவகை செய்திருக்கிறதா?
6) காதல் காமுகர்களின் வேலை என்றால், காதலற்ற, நிச்சயிக்கப்பட்ட திருமணத்திற்குப் பின்பான காமம் யாரின் வேலை? காதலுடன் காமமுறுகிறவர்களே காமுகர்கள் என்றால், காதலின்றி காமமுறுகிறவர்கள் யார்? 

இஸ்லாத்தில் நான் பெரிதும் மதிக்கும் ஒரு விஷயம் ஆண்-பெண் பேதமின்றி அது தரும் ‘திருமண பந்தத்தை முறித்து பிரிந்து போதலுக்கான உரிமை’. திருமணவாழ்க்கைகள் பெரும்பாலும் பிரச்சினைக்குள்ளாவது இந்த பிரிந்துபோவதற்கான உரிமை இல்லாமை தான். இந்து மதத்தில் அவ்வளவு சுலபமாக ஒரு பெண் தன் கணவனை விவாகரத்து செய்துவிடமுடியாது. அப்படியே போராடி விவாகரத்து பெற்றுவிட்டாலும் அவளை ஏதோ மோசமான பெண்ணாக, உடலுறவுக்கு ஏங்கும் பெண்ணாக மட்டுமே பார்க்கும் ‘கலாச்சாரம்’ உண்டு. ஆனால் இஸ்லாம் அந்தக் ’கலாச்சாரம்’ இல்லாத ஒன்று. விவாகரத்து பெற்று மறுமணம் செய்துகொண்டு மகிழ்ச்சியாக வாழும் பல இஸ்லாமியப் பெண்களை நான் பார்த்திருக்கிறேன். பல விஷயங்களில் முரட்டுத்தனமான பழமைவாதத்துடன் இருந்தாலும், இஸ்லாத்தில் இருக்கும் வெகுசில முற்போக்கான விஷயங்களில் இதுவும் ஒன்று. 

ஆக, இருக்கும் சில முற்போக்கான விஷயங்களையும் கூட அழித்து, இஸ்லாத்தை வெகுஜன மக்களிடம் வெகுதூரம் அழைத்துச் செல்லும் வேலையைத்தான் வலதுசாரி அமைப்புகளான தவ்ஹீத் ஜமாத் போன்ற அமைப்புகள் செய்கின்றன. ஏற்கனவே இந்து மத அமைப்புகளால் இஸ்லாமிய அமைப்புகள் தவறாகச் சித்தரிக்கப்படும் சூழலில் தவ்ஹீத் ஜமாத் போன்ற அமைப்புகள் உண்மையிலேயே தவறுகளைச் செய்து எரியும் தீயில் எண்ணை ஊற்றும் வேலையைச் செய்கின்றன. அவற்றை இஸ்லாமியர்களே புறக்கணித்தல் நல்லது. 

இந்த இரு கலாச்சாரக்காவலர்களையும் தாண்டி ‘சீ சீ இந்தப்பழம் புளிக்கும்’ என்ற கோஷ்டி ஒன்றும் உள்ளது. அது குறித்து என் குருநாதர் வினையூக்கியின் நண்பர் டான் அசோக் நேற்று, 
”காதலர் தினம் அன்னைக்கு எவன்லாம் கலாச்சார வகுப்பு எடுக்குறான்றதை நோட் பண்ணிட்டு அவன் பின்புலத்தை ஆராய்ஞ்சீங்கன்னா, வயசுப் பருவத்துல காதலுக்காக லோ லோ லோனு அலைஞ்சு, ஃபிகர் கிடைக்காதானு தெருத்தெருவா திரிஞ்சி, கடைசில ஒரே ஒரு லவ் கூட பண்ண முடியாம நொந்து நூடுல்ஸ் ஆகி, ஒரு பொண்ணோட கூட நட்பு வைக்கவே முடியாத லூசுப்பயலா இருந்து, கடைசியா வேற வழியே இல்லாம இந்த ’கலாச்சாரக் காவலன்’ வேஷம் போட்டவனாதான் இருப்பான்! எந்த வயது வந்த ஆணுக்கும்-பெண்ணுக்கும் காதலிக்கும் உரிமை இருக்கிறது என்பதையும், அதேபோல் பிரிந்து போகும் உரிமையும் இருக்கிறது என்பதையும், அது முழுக்க முழுக்க அவர்களின் தனிப்பட்ட விஷயம் என்பதும் புரியலைன்னா, நீங்கள்லாம் எல்.கே.ஜில சேர்றதுக்குக்கூட லாயக்கில்லாதவய்ங்கனு அர்த்தம். மூளையே தேவைப்படாத ஆர்.எஸ்.எஸ்லயும், தவ்ஹீத் ஜமாத்லயும் மட்டும் தான் சீட்டு கிடைக்கும். காதலர்கள் அனைவருக்கும், காதலிக்க நினைக்கும் அனைவருக்கும், ’கணவன் -மனைவி’கள் அனைவருக்கும் காதலர் தின வாழ்த்துக்கள். ” 
என்று ஒரு நிலைத்தகவல் போட்டிருந்தார். அதுவே பல கட்டுரைகளுக்கான விஷயத்தைச் சொல்லிவிட்டதால் இந்த ‘சீ சீ புளிக்கும்’ குழுவைப் பற்றி எதுவும் சொல்லத் தேவையில்லை. இந்தக் சீ சீ குழுவைச் சேர்ந்த பலர் காலப்போக்கில் காதலை சந்திக்கும்போது தானாகவே திருந்திவிடுவார்கள். கடைசிவரை பெண்களைப் புரிந்துகொள்ளாத, அல்லது காதலே கிடைக்காமல், காய்ந்து போனவர்கள் ஏதாவது வலதுசாரி அமைப்போடு ஒன்றிவிடுவார்கள். அவர்களைத் தான் மேலே தாக்கிவிட்டோமே, அதனால் தனிப்பகுதி தேவையில்லை. 

காதலைக் கொண்டாடுங்கள். காதலர் தினத்தை எதிர்க்கிறோம் என அலையும், முழுமனிதர்களாக பரிணாமவளர்ச்சி அடையாத கோமாளிகளைப் பார்த்து “ஏய் அங்க பாரு கோமாளி” எனச் சிரியுங்கள். காதலை எந்த நூற்றாண்டிலுமே எவராலுமே எதுவும் செய்யமுடியவில்லை. அட... ஈடன் கார்டனில் கடவுளாலேயே காதலை எதுவும் செய்ய முடியாதபோது, இந்தக் கோமாளிகள் எம்மாத்திரம்!! கிளிமூக்கு அரக்கனின் அனைத்து ரசிகர்களுக்கு காதலர் தின வாழ்த்துக்கள். 

-அன்புடன் கிளிமூக்கு அரக்கன். 




(தோழர் கிளிமூக்கு அரக்கன் பிரபலமான முகநூல் எழுத்தாளர். அவரின் எழுத்துக்களைப் பின்தொடர இந்தச் சுட்டியை அழுத்தவும்   
https://www.facebook.com/kilimookku )
Related Posts Plugin for WordPress, Blogger...