Thursday, January 23, 2014

கேஜ்ரிவால்- சரஸ்வதி சபதம் கே.ஆர் விஜயா! சில ஒற்றுமைகள்! -டான் அசோக்

சரஸ்வதி சபதம் கே.ஆர் விஜயா என்றவுடன் தமிழகத்தைப் பற்றிய பதிவு என நினைத்துவிடாதீர்கள். :-) இது டெல்லி குழப்பத்தைப் பற்றி,

செய்திகள்: 

1) டெல்லி மால்வியா நகரில் உகாண்டா மக்கள் பாலியல் தொழிலிலும், போதை மருந்து விற்பனையில் ஈடுபடுகிறார்கள் என்ற தகவலின் பேரில் அங்கே சென்றிருக்கிறது சோம்நாத் பார்தியின் கும்பல்.

2) நடு இரவில் சோதனை என்ற பெயரில் உகாண்டா மக்கள் வாழ்ந்த வீடுகளுக்குள் நுழைந்துள்ளது சட்ட அமைச்சர் தலைமையிலான ‘ஆம் ஆத்மி’ கும்பல்.

3) அங்கே இருந்த கறுப்பினப் பெண்களைத் தரக்குறைவாகப் பேசி தாக்கியிருக்கிறது. மேலும்,  ”கருப்பா இருக்கவன் கெட்டவன்” என்ற இந்திய வெள்ளையர்களின் கலாச்சாரத்தின்படி ஆப்ரிக்க மக்கள் என்றாலே மோசமானவர்கள், அவர்களால் தான் டெல்லி கெடுகிறது, டெல்லியை காலி செய்துவிட்டு ஊருக்கு ஓடுங்கள் என்ற ரீதியில் பேசிக்கொண்டே போயிருக்கிறார் சட்ட அமைச்சர்.

4) அவருடன் வந்த ஆம் ஆத்மி போராளிகள் அந்தப் பெண்களைக் கடுமையாக கண்களிலும், உடலிலும் தாக்கியிருக்கிறார்கள். பத்து நிடத்தில் அங்கு வந்த போலீசிடம் “பாலியல், போதை தொழிலுக்காக அவர்களைக் கைது செய்யுங்கள்” என உத்தரவிட்டுள்ளார் சட்ட அமைச்சர்.

5) “வாரண்ட் இல்லாமல் கைது செய்ய முடியாது. அதுவும் பெண்களை நடு இரவில் கைது செய்வது சட்டப்படி தவறு” என்று கூறி மறுத்திருக்கிறார் மாலியா பகுதியின் போலீஸ் உயரதிகாரி திரு.பால்.

6) சட்ட அமைச்சருக்கு கோபம் சுருக்கென்று ஏறியவுடன் அங்கே வாக்குவாதம் ஏற்பட்டிருக்கிறது. பிறகு போலீஸ் அடிபட்ட பெண்களை மருத்துவமனைக்கு கூட்டிச் சென்று பிறகு வீட்டில் விட்டிருக்கிறார்கள்.

7) அதே போல வாடகைக் காரில் வீட்டிற்குச் சென்று கொண்டிருந்த கறுப்பினப் பெண்கள் நால்வரை வழிமறித்து மிரட்டியிருக்கிறது ஆம் ஆத்மி கும்பல். போதை மருந்து சோதனைக்காக நடுரோட்டில் சிறுநீர் கழிக்கச் சொல்லி வற்புறுத்தியதாகவும் அப்பெண்கள் புகார் அளித்திருக்கிறார்கள்.

8) அதன் பின்பான கேஜ்ரிவாலில் நாடகங்கள் இந்தியாவே அறிந்த ஒன்று.


கருத்துக்கள்:

1) ”இந்தியாவில் எதுவுமே சட்டப்படி நடக்கவில்லை, நாங்கள் வந்தால் சட்டப்படி எல்லாம் நடந்து ஊழலை ஒழித்து புதிய சமுதாயம் படைப்போம்”, என வாக்குக் கொடுத்து ஆட்சிக்கு வந்த கேஜ்ரிவாலின் சட்ட அமைச்சர், தன்னைத் தானே பேட்மேன், ஸ்பைடர்மேன், ரஜினிகாந்த் என எண்ணி சட்டத்தைக் கையில் எடுத்துக் கொண்டு பெண்களுக்கு எதிரான குற்றங்களில் ஈடுபட்டிருப்பது மகா அயோக்கியத்தனம்! சட்டம் காங்கிரசிற்கும், பிஜேபிக்கும், பொதுமக்களுக்கும் தானா? ஆம் ஆத்மி என்ன கடவுளா?

2) பெண்கள் பாதுகாப்பை டெல்லியில் உறுதி செய்வோம் எனக் கூறிவிட்டு தன் தொகுதியில் தங்கியிருக்கும் உகாண்டா பெண்களின் கதவுகளை நடு இரவில் தட்டிய அமைச்சரின் செயலை என்ன செய்வது? எவ்வளவு பெரிய தவறான முன்னுதாரணம் இது!!

3) நடுராத்திரியில் வாரண்ட் இல்லாமல் முன்னாள் முதல்வரின் வீட்டிற்குள்ளேயே புகுந்து கைது செய்யும் அளவிற்கு ஆளுங்கட்சிக்கு அடியாளாய் செயல்படும் போலீஸ் அதிகாரிகள் இருக்கும் நாட்டில், இந்தியத் தொலைக்காட்சிகளில் முதல்முறையாக ஒரு அதிகாரி சட்டத்தை மீறி தன்னால் நடக்க முடியாது எனச் சொல்லியிருக்கிறார். பர்மா பம்பர் குலுக்கலில் திடீர் அமைச்சரான சோம்நாத் பார்திக்குதான் சட்டம் தெரியவில்லை என்றால் அதிகாரி சொன்னதைக் கேட்டு அமைதியாக வந்திருக்கலாம். அதை விட்டுவிட்டு அங்கே மல்லுக்கு நின்றது மகா பெரிய தவறு! அதிகார வெறி! போதை!

4) ஆம் ஆத்மி கும்பலால் குற்றம் சாட்டப்பட்ட  எந்தப் பெண்ணிலும் போதை மருந்துக்கான தடயங்களே இல்லை என முறையான சோதனைகளுக்குப் பின்னர் போலீசாரால் நிரூபிக்கப்பட்டுள்ளது. ஆனாலும் சோம்நாத்தோ, சோம்நாத்திற்க்காக போராடும் கேஜ்ரிவாலோ இதுபற்றி வாயே திறக்கவில்லை.

5) சோம்நாத்தின் அடாவடித்தனத்திற்கும், ஆணவத்திற்கும், அதிகார போதைக்கும் எதிராக சமூக ஆர்வலர்களும், பொதுமக்களும் அவரை பதவி நீக்கம் செய்யச் சொல்லி கேட்கும் போதும் கேஜ்ரிவால் அமைதி காப்பதோடு சோம்நாத்திற்கு ஆதரவாகவும் இருப்பது கேஜ்ரிவால் இனி அரசியலில் எப்படிச் செயல்படுவார் என்பதற்கு போதுமான உதாரணமாக இருக்கிறது!

6) எல்லாவற்றுக்கும் மேல் மக்களால் ஜனநாயக முறையில் தேர்ந்தெடுக்கப்பட்ட கேஜ்ரிவால் தன்னை ஒரு ‘அனார்கிஸ்ட்’ (அரசு என்பதே தேவையில்லை எனப் போராடுகிறவர்)ஆக அறிவித்துக் கொள்வதும், சட்டப்படி நடந்தார் என்பதற்காக ஒரு போலீஸ் அதிகாரியைப் பதவி நீக்கம் செய்யச் சொல்வதும், நடு இரவில் அசிங்கமாகவும், மிகக்கேவலமாகவும் நடந்து கொண்ட தன் அமைச்சருக்கு வக்காலத்து வாங்குவதும் நிச்சயம் காங்கிரசிடமும், பாஜகவிடமும் இல்லாத மாற்று அரசியல் தான். அந்த வகையில் கேஜ்ரிவாலை மாற்று அரசியல்வாதியாக ஏற்றுக்கொள்ளலாம்.


ஆக மொத்தம் ஒரு அரசு, சரஸ்வதி சபதம் திரைப்படத்தில் பிச்சைக்காரியாக இருக்கும் கே.ஆர் விஜயா ஒரே நொடியில் மகாராணி கே.ஆர்.விஜயாவாக மாறி ஆட்சிக்கு வருவதைப் போல மந்திரத்தால், அதிர்ஷ்டத்தால்  ஆட்சிக்கு வந்தால் அரசியல் அறிவோ, சட்ட அறிவோ, மதிநுட்பமோ, நாகரீகமோ இல்லாமல் பைத்தியக்காரத்தனமான அரசாகத்தான் இருக்கும் என்பதற்கு டெல்லி ஆம் ஆத்மி அரசு ஒரு உன்னத உதாரணம்!!!


-டான் அசோக்
writerdonashok@yahoo.com




2 comments:

திண்டுக்கல் தனபாலன் said...

நல்லாச் சொன்னீங்க... ம்...!

rahul's thoughts said...

boss, he did the raid after complaints from local nearby residents. The locals have complaint to all levels of police officers regarding drug use and prostitution and nobody took any action. Last resort they called the minister. Minister was waiting for the police for 1 1/2 hr whereas police station was in 5 minutes distance. After police came , they refused to take action. The minister caught them red hand doing illegal activity. All the video footage shown by media doesn't have anything inappropriate by minister. In the end drug mafia turned this into racial abuse and the criminals were portrayed as victims. The minister risked his life against the drug cartel. The police is not under his control. Think what will a police do in other states or countries if that the case. The minister was supported by locals. But media is being controlled by bjp,cong.

Related Posts Plugin for WordPress, Blogger...