Wednesday, August 7, 2013

தலைவா நிறுத்தப்பட்ட காரணமும் ஒரே வருடத்தில் எதிர்க்கட்சியான விஜய்யும்



எஸ்.ஏ.சந்திரசேகர் தீவிர திமுக விசுவாசி. அதாவது ஒரு காலத்தில்! அப்படி இருந்த ஒருவரை அப்படியே மாற்றிக்காட்டிய பெருமை சன் பிக்சர்ஸ் சகோதரர்களைச் சேரும். பின் சன் குழுமம் மீதான கடுப்பில் ஜெயலலிதாவிற்கு ஆதரவளித்து தாங்களே ஆளுங்கட்சியாகிவிட்ட மாயையில் குதித்ததையும் நாம் பார்த்தோம். இப்போது விஜய் நடிக்கும் தலைவா படம் வெளியிடும் தேதி அறிவிக்கப்பட்டுள்ள சூழ்நிலையில் அப்படத்திற்கு துவங்கிய முன்பதிவுகள் அனைத்தும் நிறுத்தப்பட்டுள்ளன.

கூட்டிக்கழித்துப் பார்த்ததில் இதுதான் பிரச்சினை. விஜய் ஆதரவளித்தபோது நேரில் ஜெயலலிதாவை சந்திக்காமல் தன் தந்தை எஸ்.ஏ.சந்திரசேகரை அனுப்பி வைத்தது முதல் குற்றமாக கருதப்படுகிறது. சமீபகாலமாக சன் டிவியுடன் விஜய் காட்டிவரும் நெருக்கம் இரண்டாம் குற்றமாக கருதப்படுகிறது. எல்லாவற்றுக்கும் மேலாக தினமமும் "என் மகன் எம்.ஜி.ஆர். என் மகன் தலைவன். என் மகனால்தான் மக்களுக்கு அமைதி" அது இதுவென அடித்துவிடும் எஸ்.ஏ.சந்திரசேகரின் பேட்டிகள் மூன்றாவது முக்கிய குற்றமாக கருதப்படுகிறது. நான்காவதும் மிக முக்கியமான குற்றமும் யாதெனில் தன் படத்திற்கு 'தலைவா' என பெயரிட்டது.
அதுவரை இலைமறைகாயாக இருந்த பகையை விஜய் பிறந்தநாள் விழாவிற்கு எல்லா ஏற்பாடும் செய்துவிட்ட பின் "இடம் தர முடியாது" என காவல்துறை பின்வாங்கியபோது அப்பட்டமாக வெளிப்பட்டது. பல லட்சம் மதிப்புள்ள பொருட்கள் (மளிகை சாமான் உள்ளிட்ட நலத்திட்ட பொருட்கள்) எல்லாம் வீணாய்ப் போய்விட்டதே என எஸ்.ஏ.சந்திரசேகர் புலம்பித் தீர்த்ததும் நமக்குத் தெரிந்ததுதான்.   மேலும் தலைவா படத்திற்கு வரிவிலக்கும் தமிழக அரசு தரப்பில் இருந்து மறுக்கப்பட்டது.

இப்போது தலைவா வெளியிடப்போகும் திரையரங்குகளுக்கு இதுவரை யாரும் கேள்வியே படாத மாணவர் புரட்சி படை என்ற இயக்கம் குண்டு வைக்கப்போவதாக மிரட்டினார்கள் என்ற செய்தி கசிகிறது. முதலில் தலைவா சர்ச்சைக்குரிய எந்தப் பிரச்சினையையும் பேசும் படம் அல்ல. வழக்கமான அப்பா செத்தவுடன் மகன் நாற்காலியில் உட்காரும் காட்ஃபாதர் காலத்து கதைதான் என போஸ்டர் பார்த்தாலே தெரிகிறது. இயக்குனர் விஜய்யின் பேட்டிகள் சொல்வதும் அதைதான்! இந்த லட்சணத்தில் குண்டு வைக்கும் அளவிற்கு இதில் என்ன இருக்கிறது??   மேலும் எங்கப்பன் குதிருக்குள் இல்லை என்ற லட்சணத்தில் அந்தந்த ஏரியா போலீசாரும் "திரையரங்குகளுக்கு எங்களால் பாதுகாப்பளிக்க முடியாது" என அறிவித்திருக்கிறார்கள்.
அதுமட்டுமல்லாது அபிராமி ராமநாதனை அழைத்து முன்னாள் அமைச்சாரன ஆளுங்கட்சி எம்.எல்.ஏ ஒருவர் "'இந்தப் படத்தை திரையிடுவது நல்லதாகப் படவில்லை. பாத்து இருந்துக்கங்க'
எனக் கூறியதாகவும் ஊடக செய்திகள் தெரிவிக்கின்றன.

உடனே சென்னை, செங்கல்பட்டு நாமக்கல் ,ஈரோடு திரையரங்கு முதலாளிகள் எல்லாம் கூடி, "அரசுக்கு எதிரான படமாக கருதப்படும் தலைவா படத்தை வெளியிட அரசின் ஒத்துழைப்பு அவசியம். அது உறுதியாகாத பட்சத்தில் படத்தை வெளியிட மாட்டோம்" என அறிவித்திருக்கிறார்கள். என்ன கொடுமை பாருங்கள், ஒரு படத்துக்கு தலைவா என பெயர் வைத்தால் அது தமிழக அரசுக்கே எதிரானதாம்! தமிழகத்தில் ஜனநாயகத்தின் நிலையை நினைத்து சிரிப்பதா, அழுவதா எனத் தெரியவில்லை.

"வேட்டி கட்டிய தமிழன் பிரதமராக வேண்டும்: எனச் சொன்னதற்கே கமல் அந்தப் பாடு பட்டார் எனும்போது 'தலைவா' எனப் பெயர் வைக்க விஜய்க்கும், என் மகன்தான் அடுத்த முதல்வர் எனப் பேச எஸ்.ஏ.சந்திரசேகருக்கும் என்ன திமிர்? வைக்கலாமா அப்படி? அதுவும் தமிழ்நாட்டில்?

வேலாயுதம் படத்தில் விஜய்யை யாரோ துரத்துவார்கள். அப்போது ஓடிக்கொண்டிருக்கும் விஜய், "நம்மதான் இப்ப ஆளுங்கட்சி ஆச்சே. நம்மளை யாரும் ஒன்னும் பண்ண முடியாது." என சிரித்தபடியே கூறுவார். மேலுள்ள செய்திகளை எல்லாம் படித்தபோது எனக்கு வேலாயுதத்தில் வரும் இந்தக் காட்சியை நினைத்து சிரிப்பும், பரிதாபமும் சேர்ந்து வந்தது!

ஆனால் இந்த சர்ச்சையால் தலைவாவை விழுந்து விழுந்து பார்த்து அதை வெற்றிப்படமாக்கப் போகிற தமிழக மக்களை நினைத்தாலும் பரிதாபமாகத்தான் இருக்கிறது.


செய்திச் சுட்டிகள்:




3 comments:

ssk said...

படத்தை ஹிட் பண்ண என்ன என்ன திட்டம் போட்டு கிளப்பி விடுகிறார்கள் ...எப்படியாவது கொளுத்த பணம் கொள்ளையடிக்க .....

kongango ivanda said...

இந்த பட விவகாரம் அனைத்தும் திட்டமிட்டு விஜய் அன் கோவால் நடத்தப்படும் விளம்பரம்.

indrayavanam.blogspot.com said...

தமிழகத்தின் ஜனநாயகம் வாழ்க... இதே வேலையா திரியிராங்கப்பா...

Related Posts Plugin for WordPress, Blogger...